Osteguna, 2018ko azaroak 8a.
Inoiz baino
parekatuagoa
Magnus Carlsenek eta Fabiano Caruanak
Munduko Xake Txapelketa jokatuko dute bihartik aurrera, Londresen
Aspaldi ez zegoen horren alde txikia
rankinean finalisten artean
Dena prest dago Londresko Holborn auzoko The College
eraikinean. Han hasiko da bihar Munduko Xake Txapelketa. Bi jokalari izango
dira aurrez aurre: Magnus Carlsen norvegiarra, egungo txapelduna, eta Fabiano
Caruana estatubatuarra. Hamabi partida jokatuko dituzte. Hilaren 26an litzateke
azkena, baina gerta liteke ordurako amaitua izatea lehia, bi finalistetako
batek 6,5 puntu lortuz gero. Hilaren 29tik harago ere luza daiteke, berdinketa
egon eta partida bizkorrak jokatu beharko balira. Gertatzen dena gertatzen
dela, hilaren 28an emango dituzte garaikurrak, baita diru sari handiak ere:
600.000 euro txapeldunak, eta 450.000 txapeldunordeak. Partida bizkorrak jokatuko
balituzte, 50.000 euro gutxiago jasoko lituzke jokalari bakoitzak.
400 lagunentzako tokia da The College gunea. Beteta egongo da, nahiz eta
sarrerak garestiak izan, 60 eurotik gora merkeena. Internetez ere ikusi ahal
izango da zuzenean, txapelketaren webgune ofizialaren bidez. Ordaindu egin
beharko da horretarako ere, hemezortzi euro inguru. Milioika izango dira
Carlsenen eta Caruanaren artekoa horrela ikusiko dutenak. Hori dio, behintzat,
Agonek, Munduko Txapelketako babesleak. Agonek egindako azterketaren arabera,
650 milioi lagun inguruk jokatzen dute sarritan xakean. Hala, AEBetan, Erresuma
Batuan, Alemanian, Errusian eta Indian helduen %70ek jokatzen dute noizean
behin partida bat. Datu horiek, hala ere, tentuz hartu behar dira, pentsatzekoa
baita Internetez ikusle gehien bereganatzeko Agonek martxan jarritako kanpaina
bat izan daitekeela. Edonola ere, ezin da ukatu lehiak ikusmin handia sortu
duela. Inoizko parekatuena da baten eta bestearen rankinari erreparatuz gero:
2.835 puntu ditu Carlsenek, eta hiru gutxiago Caruanak.
https://www.berria.eus/paperekoa/1874/027/001/2018-11-08/inoiz_baino_parekatuagoa.htm
Soslaia. Magnus
Carlsen
Odolean darama
xakea
27 urte ditu Magnus Carlsenek (Toensberg, Norvegia, 1990),
baina 19 zituenetik da munduko onena. 2013an irabazi zuen lehen aldiz Munduko
Txapelketa, 22 urte zituela. Viswanathan Anand indiarra hartu zuen mendean,
eta, horri esker, inoizko munduko txapeldun gazteenetan bigarrena izan zen.
Garri Kasparov bakarrik izan zen gai hura baino gazteago txapeldun izateko, 21
urterekin.
Azken urteetan Carlsenek lortu dituen garaipenek garrantzi berezia izan dute
xakearen garapenean, jokatzeko beste modu bat erakutsi baitute. Norvegiarrak ez
dauka haren aurrekoek zeukaten ikuspuntu zientifikoa. Teoria ezagutu eta
erabili egiten du, baina harago doa. Edozein posiziok barruan asko daukala
erakutsi du, baita hildako itxura daukatenak ere, batez ere lehia baten
presiopean.
Jokalari handi guztien moduan, beste pauso bat eman du Carlsenek. Haren estilo
zehatza definitzeko esan daiteke irekitzeei garrantzi mugatua ematen diela.
Hori bai, besteek baino hobeto ulertzen du partida bukaeren estrategia, eta
maisua da halakoetan. Bobby Fischer eta bereziki Kasparoven ostean asko garatu
zen irekitzean partida erabakita uzten saiatzeko joera. Irekitzean abantaila
ateratzeko eta gero abantaila hori aprobetxatzeko egin dituzte esfortzuak
jokalari gehienek azken hamarkadetan. Carlsenek, ordea, beste modu batean
bideratzen du jokoa. Bere helburua irekitzearen ostean posizio jokagarri bat
lortzea da, eta, hori eginez, partida bukaera dinamiko batera heltzea. Jokoaren
fase horretan onena da alde handiz, eta agerian utzi zuen Anandi irabazi zion
lehen Munduko Txapelketan —2013an eta 2014an nagusitu zitzaion—.
Egungo Carlsenen entrenatzaileak ordenagailuak direla esan daiteke. Haien kalkuluen
potentzia ez badu ere, kalkulu potentzia horrek irakasten duena barneratu eta
erabiltzen du. Baina Carlsen ez da ordenagailu bat, eta askotan erakutsi du
gizakia dela. Emaitza txar edo on baten ostean izandako erreakzioak edo
prentsaren aurrean noizbait eginiko iruzkinek agerian utzi dute nortasun
konplexua duela. Hain zuzen, funtsezkoa da oreka emozionala kontrolatzea lehian
zehar. Bestalde, eta psikologiak xakean duen pisua kontuan hartuta, bere
buruagan duen konfiantza arma boteretsua da. Moduren batean eta esaten ez badu
ere, Carlsenek beti pentsatzen du onena dela, eta beti izango dela gai
irabazteko modu bat topatzeko.
https://www.berria.eus/paperekoa/1893/027/001/2018-11-08/odolean_darama_xakea.htm
Soslaia. Fabiano
Caruana
Beste Fischer bat?
Duela 26 urte jaio zen Fabiano Caruana, Miamin (AEB),
baina, gurasoak italiarrak izanik, herrialde hori ordezkatu zuen 2015era arte.
Caruana ogibidez da xake jokalaria, eta Estatu Batuak ordezkatzeak badu
abantailarik. Maisu Handiaren titulua 15 urte egin aurretik lortu zuen, eta,
hori eginez, AEBetako eta Italiako inoizko Maisu Handirik gazteena bilakatu
zen. Nahiz eta Miamin jaio, New Yorkeko Brooklyn auzoan bizi izan zen txikitan,
eta han hasi zen xakean, Bobby Fischer xakelari mitikoak egin bezala. Caruanak
gurasoen laguntza eta babesa izan du beti xakean buru-belarri aritzeko.
Horregatik, eta entrenatzaile eta torneo onenak Europan daudenez, hara joan zen
bizitzera familia osoa.
2014a mugarri izan zen haren kirol ibilbidean; zehatzago esanda, urte horretan
AEBetan jokatu zuen Sinquefield kopan. Ez zen emaitza ikusgarririk espero,
baina Caruanak zur eta lur utzi zituen guztiak torneo horretako lehen zazpi
partidak irabazita, nori, eta jokalari onenetako askori: Veselin Topalov
—munduko seigarrena—, Maxime Vachier-Lagrave —bederatzigarrena—, Carlsen
—lehena—, Levon Aronian —bigarrena—, Hikaru Nakamurari —zazpigarrena— eta
berriro Topalov eta Vachier-Lagraveri. Berdindu egin zituen hurrengo hiru
partidak, eta, horri esker, torneoa irabazi zuen. Inork ez du sekula goi
mailako lehian eta munduko onenen kontra hainbeste partida jarraian irabazi.
«Izugarria da, eta marka historikoa edonorentzat», esan zuen Aronianek Caruanak
egindakoaz.
Balentria horri 2014-2015eko Nazioarteko Xake Federazioaren Sari Nagusia gehitu
zion, eta, horri esker, 2016ko hautagaien torneorako sailkatu zen. Bigarren
izan zen, Sergei Karjakinen atzetik. Beraz, Munduko Txapelketa jokatzeko
atarian geratu zen. Aurten, rankin altua izanik, zuzenean sailkatu zen
hautagaien torneoa jokatzeko. Eta bigarren ahaleginean ez zuen huts egin.
Lehena izan zen. Zazpi partidetatik hiru irabazi zituen, hiru berdindu, eta
bakarra galdu.
Caruanak oso prestaketa praktikoa egin du azken hilabeteetan. Hala, xakeko
Olinpiar Jokoetan parte hartu du. Bere estilo erasokorra du armarik onena,
baina baita ahuleziarik nabarmenena ere, askotan Carlsenen kontra aritu denean
ikusi den bezala. Bi jokalari horiek 29 partida klasiko jokatu dituzte:
Carlsenek bederatzi irabazi ditu, Caruanak bost, eta hamabostetan berdindu egin
dute.
https://www.berria.eus/paperekoa/1912/027/002/2018-11-08/beste_fischer_bat.htm